Blog

ஜப்பானின் நகோயாவில் நடைபெறும் 2026 ஆசிய பாரா விளையாட்டுப் போட்டியில், இந்திய வீரர் ஹேனி ஈட்டி எறிதலில் உலக சாதனை படைத்து தங்கப் பதக்கம் வென்றார். ஆடவர் F37/38 பிரிவில் 60.49 மீட்டர் தூரம் ஈட்டி எறிந்து, 1,116 ரேசா புள்ளிகளைப் பெற்றார். ஈரான் வீரர் ஹார்மோஸ் வெள்ளிப் பதக்கமும், சீன வீரர் யூ செங்ஜி வெண்கலப் பதக்கமும் வென்றனர். இதன் மூலம் இந்தியாவின் பதக்க எண்ணிக்கை 100-ஐக் கடந்தது

கோவையில் பள்ளியில் நிலவிய சாதிய பாகுபாட்டால் 15 வயது ஒடுக்கப்பட்ட சமூக மாணவன் தற்கொலை செய்துகொண்ட சம்பவம் அதிர்ச்சியை ஏற்படுத்தியுள்ளதாக உதயநிதி ஸ்டாலின் தெரிவித்துள்ளார். மேலும், மாணவனின் மரணத்துக்குக் காரணமான அனைவரையும் கைது செய்ய வேண்டும் வலியுறுத்தியுள்ளார். உணவுப் பழக்கம் தொடர்பான கேள்வியில் மாட்டிறைச்சி உண்பதாகக் கூறிய மாணவர் சாதிய வன்கொடுமையை எதிர்கொண்டதாகவும், இதனால் மன உளைச்சலுக்கு ஆளானதாகவும் உதயநிதி குறிப்பிட்டுள்ளார்.

ஜப்பானில் நடைபெறும் நடப்பு ஆசிய விளையாட்டு போட்டியில் போல் வால்ட்டில் வெண்கல பதக்கம் வென்று தமிழகத்தை சேர்ந்த இந்திய வீராங்கனை பரணிகா இளங்கோவன் அசத்தியுள்ளார். இதன் மூலம் போல் வால்ட்டில் பதக்கம் வென்ற முதல் இந்தியர் என்ற சாதனையை அவர் படைத்துள்ளார்.

நடப்பு ஆசிய விளையாட்டின் 7-வது நாளான இன்று (செப்.25) பல்வேறு விளையாட்டு பிரிவுகளில் இந்திய வீரர்கள், வீராங்கனைகள் பங்கேற்றனர். இதில் தடகள விளையாட்டில் போல் வால்ட் விளையாட்டில் மகளிருக்கான இறுதிச் சுற்றில் இந்தியா சார்பில் சிந்துஸ்ரீ மற்றும் பரணிகா இளங்கோவன் பங்கேற்றனர்.

இதில் 4.15 மீட்டர் உயரம் தாண்டிய பரணிகா இளங்கோவன் வெண்கலம் வென்றார். கஜகஸ்தானின் பிலினா இவனோவாவும் 4.15 மீட்டர் உயரம் தாண்டி இருந்தார். இதனால் இருவரும் பதக்கத்தை பகிர்ந்து கொண்டனர். இதில் தங்கத்தை ஜப்பான் வீராங்கனையும், வெள்ளியை சீன வீராங்கனையும் வென்றனர்.

முதல்வர் விஜய் வாழ்த்து

“ஜப்பானில் நடைபெற்று வரும் ஆசிய விளையாட்டு போட்டியில், கோல் ஊன்றித் தாண்டும் (Pole Vault) போட்டியில் வெண்கலப் பதக்கம் வென்று தமிழகத்துக்கும், இந்தியாவுக்கும் பெருமை சேர்த்துள்ள தடகள வீராங்கனை பரணிகா இளங்கோவனுக்கு எனது மனமார்ந்த பாராட்டுகளையும், நல்வாழ்த்துகளையும் தெரிவித்துக் கொள்கிறேன்.

கடின உழைப்பு மற்றும் விடாமுயற்சியால் இவ்வெற்றியைப் பெற்றுள்ள அவரது சாதனையைப் பாராட்டும் வகையில், தமிழக அரசின் சார்பில் ரூ.30 லட்சம் ஊக்கத்தொகை வழங்கப்படும்.

அவரது வெற்றி, இலக்கை நோக்கி அயராது உழைக்கும் விளையாட்டு வீரர், வீராங்கனைகளுக்குப் புதிய நம்பிக்கையையும், ஊக்கத்தையும் அளிக்கும். பரணிகா இளங்கோவன் தொடர்ந்து பல உயரங்களை அடைய வாழ்த்துகிறேன்” என்று முதல்வர் விஜய் தெரிவித்துள்ளார்.

 

புதுடெல்லி: தலைமைத் தேர்தல் ஆணையர் ஞானேஷ் குமார் உடனடியாக பதவி விலகாவிட்டால் அக்டோபர் 2-ம் தேதி முதல் நாடு தழுவிய அளவிலான போராட்டம் நடத்தப்படும் என்று கரப்பான்பூச்சி ஜனதா கட்சியின் தலைவர் அபிஜித் திப்கே அறிவித்துள்ளார். சனிக்கிழமைக்குள் (நாளை) ஞானேஷ் குமார் பதவி விலகாவிட்டால், சிஜேபி சார்பில் அக்டோபர் 2 அன்று தேசிய அளவிலான போராட்டம் தொடங்கப்படும் என்று அறிவித்துள்ளார்.

இது குறித்து அவர் மேலும் கூறியது: “நமது நாட்டில் தேர்தல்கள் முறைகேடாக நடத்தப்படுகின்றன. ஆனால், முறைகேடுகள் நிறைந்த இந்த தேர்தல்களில் எதிர்க்கட்சிகள் தொடர்ந்து பங்கேற்பதன் மூலம் அந்த தேர்தல்களுக்கு நீங்கள் அங்கீகாரம் அளிக்கிறீர்கள். தேர்தலில் போட்டியிடாமல் எதிர்க்கட்சிகள் புறக்கணிக்க வேண்டும்.

மேலும், அவை சுதந்திரமாகவும் நியாயமாகவும் நடைபெறுவது போன்ற ஒரு மாயையைத் தக்கவைக்கவும் உதவுகிறீர்கள். ஒருவேளை, தேர்தலில் போட்டியிடாவிட்டால் தங்களது கட்சி அரசியலில் இல்லாமல் போய்விடுமோ என்ற அச்சத்தில் நீங்கள் (எதிர்க்கட்சிகள்) தொடர்ந்து போட்டியிடலாம். ஆனால், வாக்குகள் திருடப்படும்போது, உங்களுடைய சட்டப்பேரவை மற்றும் நாடாளுமன்ற உறுப்பினர்கள் அவர்கள் பக்கம் இழுக்கப்படும்போது, உங்கள் கட்சிகள் பிளவுபடுத்தப்படும்போது, நீங்கள் எதைப் பாதுகாக்க முயற்சிக்கிறீர்கள்?

இது அரசியல் பிழைப்புக்கான முயற்சி அல்ல. உங்களை பலவீனப்படுத்தவோ, உங்கள் கட்சியைப் பிளவுபடுத்த, உங்களுடைய தேர்ந்தெடுக்கப்பட்ட பிரதிநிதிகளைத் தன்வசப்படுத்தக்கூடிய ஒரு அமைப்பில், நீங்கள் உயிர்வாழ மட்டுமே முயற்சிக்கிறீர்கள். இப்படி எவ்வளவு காலத்துக்கு உங்களால் தாக்குப்பிடிக்க முடியும்?

உங்களுக்குத் தேவையான மாநிலங்களில் தேர்தல் முறைகேடு நடக்கும்போது மட்டும் அதைப் பற்றிப் பேசிவிட்டு, மற்ற இடங்களில் நடக்கும்போது மவுனமாக இருக்கிறீர்கள். தேர்தல் முறைகேடு என்பது எந்த மாநிலத்தில் அல்லது எந்தக் கட்சி பாதிக்கப்படுகிறது என்றில்லாமல் ஒரு முக்கியப் பிரச்சினையாக அனைத்துக் கட்சியினரும் நினைக்க வேண்டும்.

தலைமைத் தேர்தல் ஆணையர் ஞானேஷ் குமாருக்கு எதிராக அக்டோபர் 2-ல் மும்பையில் தொடங்கும் போராட்டம், நாடு முழுவதும் உள்ள அனைத்து நகரங்களிலும் விரிவுபடுத்தப்படும். காந்தி ஜெயந்தி தினத்தில், ஜனநாயகத்தைக் காக்க நாம் உறுதியேற்போம்” என்று அவர் தெரிவித்தார்.

 

“தமிழகத்தில் இளம்பெண்களை, பச்சைப் பிள்ளைகளை ஒருவன் இத்தனை ஆண்டுகளாக சீரழித்துக்கொண்டு இருந்துள்ளான். அந்த வழக்கை திமுக ஆட்சியில் மூடி மறைத்துள்ளார்கள். இதுபற்றி தமிழகமே கேள்வி கேட்கிறது, வாயைத் திறங்கள் ஸ்டாலின் சார்” என ஜெம் வீரமணி விவகாரத்தை குறிப்பிட்டு முதல்வர் விஜய் கேள்வி எழுப்பியுள்ளார்.

மதுராந்தகம் சட்​டப்​பேரவை இடைத்​தேர்​தலில் தவெக சார்​பில் போட்​டி​யிடும் வேட்​பாளர் மரகதம் குமர​வேலை ஆதரித்​து, தொழுப்​பேடு பகு​தி​யில் நடக்கும் பிரச்​சா​ரக் கூட்டத்தில் பங்கேற்று பேசிய முதல்வர் விஜய், “ நான் இங்கு முதல்வராக வரவில்லை. இடைத்தேர்தலுக்காக ஓட்டுக் கேட்டு உங்கள் வீட்டு பிள்ளையாக வந்துள்ளேன். ஏன் உங்கள் விஜய் ஆட்சிக்கு வரக் கூடாதா? தவெக ஆட்சிக்கு வரக் கூடாதா? பிறகு ஏன் இந்த தீயசக்தி திமுக நம்மை பார்த்து தினம் தினம் ஆபாசமாக பேசுகிறது.

நாட்டில் இப்போது ஒரே ஆபாசநதியாக ஓடிக் கொண்டிருக்கிறது. நான் வெற்றி பெற்றதற்கு மக்கள் தான் காரணம். அன்று ஜெயலலிதாவை ஸ்டாலின் அவதூறாக பேசினார். இப்போது அவரது குடும்பத்தில் உள்ளவர்கள் இப்படி பேசுகிறார்கள். அவ்வாறு பேசும் திமுகவுக்கு அதிமுக மறைமுகமாக ஆதரவளிக்கிறது.

ஜெயலலிதாவை அவமதித்த திமுகவுடன் கூட்டணி வைக்க முடிவு செய்தபோதே அதிமுகவின் முகமூடி கிழிந்துவிட்டது. மதுராந்தகத்தில் என் தங்கைக்கு விசில் சின்னத்தில் வாக்களிக்க வேண்டும். விசிலுக்கு வாக்களிப்பது என்பது பெண்களை அசிங்கமாக, ஆபாசமாக பேசுவோருக்கு கொடுக்கும் மிகப்பெரிய தண்டனையாக இருக்கும். திமுகவுக்கோ, அதிமுகவுக்கோ வாக்களித்தால் அது பெண்களை ஆபாசமாக பேசுவதை ஆதரிப்பதாக மாறிவிடும். நம் வீட்டு பெண்களை இவ்வாறு பேசுபவர்களை சும்மா விடக்கூடாது.

108 இடங்களில் வென்ற நாம் ஆட்சியமைக்க கூடாது என திமுக, அதிமுகவும் ஒரு கூத்து நடத்தினார்கள். அதிமுக பாஜகவின் ஒரு பிரிவு, ஆனால் இப்போது அதிமுக திமுகவின் கிளைக்கழகமாக மாறிவிட்டது. மக்கள் காசை கொள்ளை அடித்தவர்கள் ஆட்சிக்கு வரலாம், சாமானியர்கள் ஆட்சிக்கு வரக்கூடாது என அவர்கள் நினைக்கிறார்கள்.

விஜய் ஆட்சிக்கு வந்துவிட்டால் ஊழல் செய்யமுடியாது, கொள்ளை அடிக்க முடியாது என திமுகவும், அதிமுகவும் திட்டம் போட்டார்கள். இதனையே ஐயுஎம்எல் சட்டப்பேரவையில் சொன்னார்கள். எனவேதான் திமுக செய்த ஊழல்களை சட்டப்பேரவையில் சொன்னேன். சட்டப்பேரவையில் ஊழல் என சொல்லிவிட்டால், திமுகவினர் ஆதாரத்தை காட்டச் சொல்வார்கள். ஆதாரம் காட்டினால், அது நீதிமன்றத்தில் நிரூபிக்கப்படவில்லை என்பார்கள். நீதிமன்றத்தில் உள்ளதை பேசக்கூடாது என்பார்கள். நான் பேச்சை ஆரம்பிக்கும் போது கூட்டமாக சத்தம் போடுவார்கள். அவர்களின் நோக்கம் என்னை பேசவிடக்கூடாது என்பதிலேயே இருந்தது. அதனால் தான் நான் சத்தமாக பேச வேண்டியுள்ளது.

ஊழல் செய்த கூட்டத்தை விடவே மாட்டோம் என திமுகவுக்கும், ஸ்டாலினுக்கும் சொல்லிக்கொள்கிறேன். இதுவரை ஊழலே செய்ததில்லை என திமுகவால் சொல்ல முடியுமா? இனிமேல் ஊழலே செய்யமாட்டேன் என திமுகவால் சொல்ல முடியுமா? எப்படி பார்த்தாலும் இரண்டே பேருக்கும் இடையேதான் போட்டி. தீய சக்தி திமுகவுக்கும், தூயசக்தி தவெகவுக்கும் இடையேதான் போட்டி. எனது கேள்வி எப்போதும் ஸ்டாலினுக்குதான்.

நான் ஒரு பாலத்தில் ஆய்வு செய்ய சென்றால், அது நாங்கள் கட்டியது என திமுக சொல்கிறது. அந்தப் பாலத்தை உங்கள் வீட்டில் காசில் கட்டினீர்களா ஸ்டாலின் சார்? உங்களிடம்தான் சொந்தமாக கார் கூட இல்லையே சார்? முதல்வர் என்பவர் மக்களின் வேலைக்காரன். முதல்வர் என்றால் மக்களின் முதலாளி கிடையாது. தமிழகத்துக்கு நீங்கள்தான் முதலாளி போல பேசுகிறீர்கள்.

தவெக ஆட்சியை குறுக்கு வழியில் கவிழ்க்க திமுக திட்டம் போடுகிறது. தவெக ஆட்சியை யாராலும் அசைக்க முடியாது. ஆட்சியமைக்கும் போது மக்களிடம் அவகாசம் கேட்டேன். இப்போது விஜய் அரசும் கடன் தான் வாங்குகிறது என்கிறார்கள். நான் மக்களுக்கு நல்லது செய்யவே கடன் வாங்குகிறேன், கொள்ளையடிக்க அல்ல. ஆறு சிலிண்டர் தருவதாக சொன்னேன், இப்போது நிதிநிலையை கருத்தில் கொண்டு 3 சிலிண்டர் தந்துள்ளேன். இதனை விமர்சித்து வருகிறார்கள்.

எம்ஜிஆரும், ஜெயலலிதாவும் தீயசக்தி என சொன்ன திமுகவோடு கூட்டணி சேர்ந்து ஆட்சியமைக்க அதிமுக முயற்சி செய்ததால் அக்கட்சியின் தொண்டர்களுக்கு பெரும் மனவலி ஏற்பட்டது. இதனால்தான் மரகதம் குமரவேல் நம்மிடம் வந்து சேர்ந்தார். எம்ஜிஆர், ஜெயலலிதாவை போல எனக்கும் திமுக தான் எதிரி.

எப்போது பார்த்தாலும் பாஜக உள்ளே வந்துவிடும் என்று பூச்சாண்டி காட்டுவார்கள். இப்போது என்ன ஆச்சு, பாஜகவே மூச்சுவிட திணறுகிறது. திமுக வேறு, பாஜக வேறு அல்ல. டெல்லியில் உள்ள திமுகவுக்கு பெயர் பாஜக, தமிழகத்தில் உள்ள பாஜகவுக்கு பெயர்தான் திமுக. எப்போது தொகுதி மறுவரையறை மசோதா திரும்ப வரும், எப்போது பாஜகவுடன் சேரலாம் என திமுக காத்துக்கொண்டுள்ளது. இடைத்தேர்தலில் திமுக வென்றுவிட்டால், ஜனவரி மாதத்தில் தவெக ஆட்சி கலையும் என திமுக பேசுகிறது. திமுக, பாஜக, அதிமுக எல்லாம் ஒரே குட்டையில் ஊறிய மட்டைகள்.

இந்த விஜய்யையும், விஜய் கூட உள்ள மக்களையும் தொடாதீர்கள். அப்புறம் ஏன் தொட்டோம் என காலத்துக்கும் புலம்புவீர்கள். நம் மீது எந்தக் குற்றச்சாட்டு வைக்க முடியவில்லை என்ற விரக்தியில், தமிழக பெண்களை அசிங்கமாக திமுக பேசுகிறது. இதனை ஸ்டாலினும், அவரது குடும்பத்தினரும் பார்த்து ரசிக்கிறார்கள்.

தமிழகத்தில் இளம்பெண்களை, பச்சைப் பிள்ளைகளை ஒருவன் இத்தனை ஆண்டுகளாக சீரழித்துக்கொண்டு இருந்துள்ளான். அந்த வழக்கை திமுக ஆட்சியில் மூடி மறைத்துள்ளார்கள். இதுபற்றி தமிழகமே கேள்வி கேட்கிறது, வாயைத் திறங்கள் ஸ்டாலின் சார். இந்த விவகாரத்தில் அதிமுகவும் வாயை திறக்கவில்லை. இதில் கூடவா கூட்டு?

பெண்கள் பாதுகாப்புக்கே பிறந்தது போல பேசும் திமுக, அதிமுகவும், அந்த ஆளைப் பற்றி வாய் திறக்கவே இல்லை. ஆனால் அந்தக் குற்றவாளியை உள்ளே தூக்கி வைத்துவிட்டோம். பச்சைப் பிள்ளைகளின் வலியை பேச முடியவில்லை என்றால் என்ன அரசியல் செய்கிறீர்கள். எனவே, இந்த இடைத்தேர்தலில் திமுக, அதிமுகவுக்கு பாடம் புகட்ட வேண்டும்.” என்றார்.

நேற்று முன்தினம் (செப்டம்பர் 23) அமெரிக்காவிற்குச் சென்றார் சீன அதிபர் ஜி ஜின்பிங்.

இவரை விமான நிலையத்திற்கே நேரில் சென்று வரவேற்றிருந்தார் அமெரிக்க அதிபர் ட்ரம்ப்.

மிக முக்கியமான நபர்களுக்கு மட்டுமே விமான நிலையத்திற்கே சென்று அமெரிக்க அதிபர் வரவேற்பார் என்பது குறிப்பிடத்தக்கது.

ஜின்பிங் பயணம் ஏன் முக்கியமானது?

ஜின்பிங்கின் இந்தப் பயணம் மிக மிக முக்கிய நேரத்தில் நடந்திருக்கிறது. ஈரானும், சீனாவும் நெருங்கிய கூட்டாளிகள். ஈரான் மீது அமெரிக்கா போர் தொடர்ந்துகொண்டிருக்கும் இந்த வேளையில் இந்தப் பயணம் ஏற்பட்டுள்ளது.

அடுத்ததாக, ரஷ்யாவிடமிருந்து எண்ணெய் இறக்குமதி செய்யும் டாப் முதல் நாடு சீனா. கடந்த வாரம்தான், ரஷ்யாவிடமிருந்து எண்ணெய் இறக்குமதி செய்யும் டாப் 5 நாடுகளுக்கு 100 சதவிகித வரி விதிக்கும் ‘ரஷ்ய தடைச் சட்டத்தில்’ கையெழுத்திட்டார் ட்ரம்ப்.

இது இன்னும் அமலுக்கு வரவில்லை. ஜின்பிங்கின் பயணத்திற்காக அமல் தள்ளிச் சென்றுள்ளது. இதுவும் மிக முக்கியமான ஒன்று.

இரு நாடுகளுமே ஏ.ஐ-யில் முன்னணியில் இருந்து வருகிறது. இப்போது ஏ.ஐ தொழில்நுட்ப ரேஸில் யார் முந்துவார் என்கிற போட்டியும் நிலவி வருகிறது. இந்த நேரத்தில் இந்தப் பயணம் என்பது கவனிக்கப்படுகிறது.

மிக முக்கியமாக, இரு நாடுகளுக்கு இடையேயும் அமைதியாக வணிகப் போர் நடந்துகொண்டேதான் இருக்கிறது.

தொழில்நுட்பத் தடைகள், விவசாய ஏற்றுமதிகள் மற்றும் அரிய கனிமங்களின் சப்ளை ஆகியவற்றில் இரு நாடுகளுக்கு இடையே விரிசல் இருந்து வருகிறது.

இது இப்போதைக்கு ஒப்பந்தங்கள் மூலம் இரண்டு மாதங்களுக்குத் தள்ளிப்போடப்பட்டிருக்கிறது.

இந்த நேரத்தில்தான் இந்தப் பயணம் நடந்திருக்கிறது.

ட்ரம்ப் பேச்சு

நேற்று வெள்ளை மாளிகையின் ஓவல் அலுவலகத்தில் ட்ரம்ப் – ஜி ஜின்பிங் சந்திப்பு நடந்தது.

இந்தச் சந்திப்பு குறித்து ட்ரம்ப், “அதிபர் ஜி, மேடம் பெங் மற்றும் சீனக் குழுவை எங்களது அழகான வெள்ளை மாளிகைக்கு வரவேற்பதில் பெருமகிழ்ச்சி. இது எங்களுக்குக் கிடைத்த மிகப்பெரிய கௌரவம்.

கடந்த மே மாதம் பெய்ஜிங்கில் உங்களை நேரில் சந்திக்கும் வாய்ப்பு கிடைத்தது. அங்கு எங்களுக்கு அளிக்கப்பட்ட பிரமாண்டமான, மிக நேர்த்தியான உபசரிப்பு மறக்க முடியாதது.

அமெரிக்காவிற்கு இரண்டாவது முறையாக அரசுமுறைச் சுற்றுப்பயணம் மேற்கொள்ளும் முதல் சீனத் தலைவர் என்ற பெருமையைப் பெறும் அதிபர் ஜியை வாஷிங்டனில் உபசரிப்பதில் மெலனியாவும் நானும் பெருமிதம் கொள்கிறோம்.

2016-ல் நான் முதன்முறையாக அதிபராகத் தேர்ந்தெடுக்கப்பட்ட காலத்திலிருந்தே, அதிபர் ஜியும் நானும் பரஸ்பர மரியாதை மற்றும் எங்களது மக்களின் முக்கிய நலன்களின் அடிப்படையில் ஒரு உண்மையான, மிகச் சிறந்த நட்புறவை வளர்த்தெடுத்துள்ளோம்.

வெள்ளை மாளிகையில் நாம் இருவரும் ஒன்றாகச் சந்திப்பது இதுவே முதல்முறை” என்று பேசியிருந்தார்.

ஜின்பிங் பேச்சு

ஜி ஜின்பிங் பேசும்போது, “இன்று அதிபர் ட்ரம்பும் நானும் பல முக்கிய விவகாரங்களில் ஒருமித்த கருத்தை எட்டியுள்ளோம்.

இது ஆக்கபூர்வமான சீனா-அமெரிக்க உறவுக்குப் புதிய பரிமாணத்தைச் சேர்த்துள்ளதோடு, இருநாட்டு உறவுகளுக்கும் புதிய வழிகாட்டுதலையும் வழங்கியுள்ளது.

80 ஆண்டுகளுக்கு முன்பாக, ஜப்பானிய ராணுவ ஆக்கிரமிப்பாளர்களுக்கு எதிரான போரில் சீன மற்றும் அமெரிக்க மக்கள் தோளோடு தோள் நின்று போராடினார்கள்.

ரத்தத்தாலும் தியாகத்தாலும் செதுக்கப்பட்ட இத்தகைய ஆழமான நட்புறவு, தலைமுறை கடந்து நிச்சயம் நிலைத்து நிற்கும்.

அதிபர் ட்ரம்ப் ‘மேக் அமெரிக்கா கிரேட் அகைன்’ என்று அமெரிக்க மக்களைப் பிரமாண்டமான வளர்ச்சியை நோக்கி வழிநடத்த போவதாக உறுதியேற்றுள்ளார்.

சீனாவோ தேசிய மறுமலர்ச்சியை அடைவதில் தீவிரமாகி, நவீனமயமாக்கல் மூலம் புதிய சாதனைகளைப் படைத்து வருகிறது.

இந்த இரண்டும் மிகவும் முக்கியமானவை. அதே வேளையில் அவை இரண்டும் ஒன்றுக்கு ஒன்று வலுசேர்க்கக்கூடியவை.

சீனாவும் அமெரிக்காவும் பொறுப்புமிக்க வல்லரசுகளாகச் செயல்பட வேண்டும். எங்களது மக்களின் எதிர்பார்ப்புகளைப் பூர்த்தி செய்து, காலத்தின் மாற்றத்திற்கு ஏற்ப இயங்கி,

பெருநாடுகள் இணைந்து வாழ்வதற்கான ஒரு புதிய அணுகுமுறையைக் கண்டறிய வேண்டும்” என்று பேசியிருந்தார்.